कर्मचारीको विदेश भ्रमण रोक्न प्रधानमन्त्रीको निर्देशन

काठमाडौं, असार ३० ।प्रधानमन्त्री शेरबहादुर देउवाले सरकारी कर्मचारीको अनावश्यक विदेश भ्रमण रोक्न नवनियुक्त मुख्य सचिवलाई निर्देशन दिएका छन्।

प्रधानमन्त्रीका प्रेस संयोजक गोविन्द परियाका अनुसार प्रधानमन्त्री देउवाले नवनियुक्त मुख्य सचिव राजेन्द्रकिशोर क्षेत्रीलाई टेलिफोन गरेर सचिवहरुको अनावश्यक भ्रमण रोक्न निर्देशन दिएका हुन्।

‘प्रधानमन्त्रीले सचिवहरुको विदेश भ्रमण अनावश्यक र असम्बन्धित विषयमा भएको पत्रपत्रिकामा आएपछि त्यसप्रति चासो देखाउनु भएको छ। उहाँले अाजै असान्दर्भिक विदेश भ्रमण तत्काल रोक्न मुख्य सचिवलाई निर्देशन दिनु भएकोछ’, परियारले भने, ‘नवनियुक्त मुख्य सचिवले सम्बन्धित सचिवहरुलाई यो विषयमा सर्कुलर गरिसक्नु भएको छ।’

सरकारी कर्मचारी अनावश्यक रुपमा राज्यको ढुकुटीको स्रोतबाट विदेश भ्रमणमा गएको नागरिक दैनिकले सार्वजनिक गरेको थियो। ‘त्यसबारे सरकारले अझ छानवीन गर्ने नै छ। तत्कालका लागि दुई सरकार पक्षीय र जानैपर्ने बाहेकका विदेश भ्रमण नगर्न प्रधानमन्त्रीले निर्देशन दिनु भएको छ’, परियारले भने।

मुख्य सचिव क्षेत्रीले आफ्नो पद बहाली कार्यक्रमलाई सम्बोधनबाटै सचिवहरुलाई विदेश भ्रमण नगर्न र आफू मातहतका मन्त्रालयबाट नपठाउन निर्देशन दिएका छन्। बिहीबार बिहान मन्त्रिपरिषद बैठकले क्षेत्रीलाई मुख्य सचिवमा नियुक्त गरेको थियो। आजै दिउँसोदेखि पद सम्हाल्दै उनले सचिवहरुलाई विदेश सयर बन्द गर्न भनेका हुन्।  समाचार आजको नागरिकमा छापिएको छ ।

मुख्य सचिव सोमलाल सुवेदी एशियाली विकास बैंकको वैकल्पिक कार्यकारी निर्देशकको रुपमा फिलिपिन्स जाने भएपछि उनको स्थानमा सरकारले क्षेत्रीलाई नियुक्त गरेको हो।

 क्याटेगोरीः राजनीति