नेवाःया अस्तित्व?

शाक्य सुरेन

 

shakya_suern

थुगुसी विराट नेपालभाषा सम्मेलनय्
कविता पाठ याये मखंसां
कवित पाठ यायेखन –
अमेरिकाया वासिङटन डिसिइ ।
कविताया शीर्षक — नेवाःया अस्तित्व ।

जिपिं नं छन्हुया दिनय् नेवाः खः, नेपाःया
जिमिगु आदिभूमि खः स्वनिगः नेपाःया ।
अनया कृष्ण देगः, पशुपति
स्वयम्भु, खास्ति
करुणामय, महाबौद्ध
जिमिगु पहिचान खः ।
न्हापा जिमि थःगु हे संगीत परम्परा दूगु खः ।
थःगु हे तजिलजि नखः दूगु खः ,
थःगु हे संवत् दूगु खः — नेपाल संवत् ।
थःगु हे भाय् दूगु खः – नेपालभाषा ।
थःगु हे लिपि दूगु खः – रंजना लिपि ।
थौं जिपिं प्यालेस्टाइनी थें लागाहिन जयाच्वना,
थौं जिपिं गोरखाली नेपाली थें प्रवासी जुयाच्वना ।
डायस्पोरा पीडा । डायस्पोरा जिन्दगी ।
म्ह विदेशय् । मन थःगु देशय् ।
अजा अजि धायेसःपिं जिमि छम्ह निम्ह
ख्वपया गनं कुनय् दनि हँ ।
नेवाः पहचह वःगु जिमिगु पुख्र्यौली छेँ छखानिखा
यल, हःखाया कुनय् गनं दनि हँ ।

आःला – स्वनिगः राजधानी जक मखु, ७५ जिल्लाया सदरमुकाम जुइधुंकल खनी ।
नेता, उपनेतापिनिगु होमल्याण्ड जुइधुंकल खनी ।
अन मालश्रीया धुन मखु , नौमति बाजाया जक सः दु आः ।
धाः, धिमे व खिंया बोल मख, नौमति बाजाया जक सः दु आः ।
अन तुतः व भजन मखु, द्यौसी भैलो जक न्यने दु आः ।
अन – नेवा भ्वय्, नेवाः सवाः
नेवाः नसा मदयेधुंकल ।
तर,
छन्हुया दिनय्,
इतिहासया कालखण्डय्,
जिपिं नं नेवाः खः व नेपाःया ।
जिमिगु आदिभूमि खः व स्वनिगः – व नेपाःया ।
०००
कन्हेखुन्हु न्हयलं चायेवं तिनि सिल –
थ्व ला म्हगसया कविता पाठ खनी ।
मतिइ वल –
यदि प्रभु धइमह थ्व संसारय् दूगु खःसा
जिं प्रार्थना याये –
“हे प्रभु । थुज्वःगु म्हगस गबलें म्हंके म्वालेमा ।
हे प्रभु । थुथ्वःगु कविता गबलें ज्वलय् पाठ यायेम्वालेमा ।

 क्याटेगोरीः नेपाल भाषा