म्हिगःनिसें थौं तकं सतकय् पद्मरत्न


म्हिगः तक कमल थापा विरुद्ध ल्वायेत ओलीपिसं पद्मरत्नलिसे जानाः मोर्चाबन्दी याःगु खः ।

थौं पद्मरत्नलिसे ल्वायेगु लागिं कमल थापालिसे मोर्चाबन्दी यानाच्वंगु दु ।


 

नेवाः न्ह्यलुवा पद्मरत्न तुलाधरयात उकुन्हु नेवाः अधिकार सिरपाः लःल्हाःगु समारोहय् मेम्ह न्ह्यलुवा मल्ल के. सुन्दरजुं कनादिल, ‘२००७ सालय् मचाम्ह पद्मरत्नजु छपु ध्वाँय् ज्वनाः सतकय् ब्वाँय् झायादीगु खः। वयां लिपा वयक: ०१७ साल, ०३६ साल, ०४२ साल, ०४६ साल, ०६२ साल जुजुं थौं ०७३ सालय् तक नं सतकय् हे च्वंच्वनादीगु दु ।’

पद्मरत्नया थ्व सतक यात्रा नेपाःया आदिवासी जनजातिं ल्ह्वनाच्वंगु अधिकारया आन्दोलनया छगू प्रतिबिम्ब खः ।

गुगु इलय् देशय् पञ्चायती व्यवस्था कायम जुयाच्वंगु खः, उगु इलय् वयक: जनपक्षीय नेताया रुपय् लोकंह्वाः। वयक:लं थःत वामपन्थी धकाः म्हसीका बीगु याःसां वयक:यात तत्कालीन माले व लिपा एमालेलिसे सतीम्ह धकाः काइगु खः । ख नं वयकलं एमालेया सुर्द्य: चिं कयाः चुनाव नं ल्वानादिल । उकिं वयक:यात एमाले नेता धकाः द्वपं बीगु स्वाभाविक खः । यद्यपि वयक: एमाले नेता मखुसां एमालेया नेतातलिसे वयक:या तःधंगु उठबस दु । वयकलं गुगु खँ ल्ह्वनेगु यानादीगु खः, उकी एमाले व एमाले नेतातय् पूर्ण समर्थन दु ।

म्हिगः तक उमि शत्रु कमल थापा, मित्र पद्मरत्न तुलाधर । थौं शत्रु पद्मरत्न, मित्र कमल थापा जुल । थथे गय् जूगु ?

अबलय् एमाले नेतातयसं याइगु आन्दोलन वा विद्रोह तत्कालीन पञ्चायती व्यवस्था विरुद्ध खः । अबलय् पञ्चायती व्यवस्थायात न्ह्याकाच्वंपिं धइपिं थ्वहे कमल थापा, सूर्यबहादुर थापा आदिपिं खः । गुगु इलय् पद्मरत्न सडकय् दीगु खः, अबलय् थौंया केपी ओली (लगायत मेपिं एमाले नेतात) नं पद्मरत्नया नापनापं सडकय् हे दुगु खः । अबलय् सत्ताय् दुपिं सूर्यबहादुर थापा, कमल थापा मण्डलीलिसे संघर्ष यायेगु मोर्चाय् पद्मरत्न, केपी ओलीपिं छथाय् हे दुगु खः । छगू हे सतकय् दुगु खः ।

तर आः दृश्य पात । म्हिगः सतकय् दुपिं केपी ओलीपिं थौं सत्ताय् थ्यन । तर थौं उपिं सत्ताय् थ्यनेवं पद्मरत्नं म्हिगःनिसें ल्ह्वना वयाच्वंगु माग उमिगु लागिं साम्प्रदायिक जुल । पद्मरत्न देश टुक्रा याइम्ह जुल । पद्मरत्न उमित दकलय् मयःम्ह मनू जुल ।
पद्मरत्न वहे खः । म्हिगः वयक:यात पञ्चायती व्यवस्थायात म्वाकातःपिं कमल थापा, सूर्यबहादुर थापातयसं थ्व द्वपं बीगु खः । उमिसं पद्मरत्नयात साम्प्रदायिक नेता धकाः द्वपं बिउगु खः, देश टुक्रा याइम्ह नेता धकाः द्वपं बिउगु खः । उमिगु लागिं पद्मरत्न छम्ह खतरनाक व्यक्ति जुयाच्वंगु खः ।

तर अबलय् पञ्चायती व्यवस्थां अज्याःगु द्वपं बिउगु इलय् नं पद्मरत्न व केपी ओली नापं हे दुगु खः । पञ्चायती व्यवस्थां पद्मरत्नयात देश साम्प्रदायिक नेता धाःबलय् केपी ओली व वयक:या पार्टीं पद्मरत्न देश टुक्रा याइम्ह मखु, थःगु हक फ्वनाच्वंम्ह अधिकारकर्मी खः धकाः संरक्षण बिउगु खः, प्रतिरोध याःगु खः ।

म्हिगः तक कमल थापा विरुद्ध ल्वायेत उमिसं पद्मरत्नलिसे जानाः मोर्चाबन्दी याःगु खः । थौं पद्मरत्नलिसे ल्वायेगु लागिं कमल थापालिसे मोर्चाबन्दी यानाच्वंगु दु । केपी ओलीया मोर्चा थुभनं छाय् हिउगु खः?

तर थौं दृश्यय् सर्गः–पाःताःया फरक वल । केपी ओली सत्ताय् थ्यनेवं पद्मरत्न वयक:या लागिं हानं साम्प्रदायिक जुया बिल । म्हिगः पञ्चायती व्यवस्थां जक पद्मरत्नयात साम्प्रदायिक धाइगु, थौं थः हे सहयात्रीतयसं तकं साम्प्रदायिक धायेगु शुरु याना हल । थ्व हिउपाः गथे यानाः वल ?

केपी ओली थौं पद्मरत्नं आयोजना याइगु आमसभाय् स्वयां नं कमल थापां आयोजना याइगु पृथ्वीनारायण शाहया बुन्हि ज्याझ्वलय् वनेत अप्वः आयबू ।

म्हिगः पद्मरत्न लिसे लिसें हे सतकय् दुगु इलय् केपी ओलीं गबलय् पृथ्वीनारायण शाहया बुन्हि न्यायेकूगु दु ? कमल थापां ला अबलय् नं पृथ्वीनारायण शाहया बुन्हि हना हे च्वंगु खः । अबलय् केपी ओली गुगु बुन्हि कुन्हु झाःगु दु ? केपी ओलीया पार्टीं अबलय् गुगु दिनय् पृथ्वीनारायण शाहया बुन्हि न्यायेकूगु दु ? अबलय् गबलें हे न्यायेकेम्वाःगु पृथ्वीनारायण शाहया बुन्हि थौं छाय् न्यायेकेम्वाःगु ? अबलय् गबलें हे पद्मरत्न साम्प्रदायिक मजू, थौं छाय् जुल ?

म्हिगः सतकय् लानाच्वंगु इलय् तक ब्राम्हणवाद विरोधीतलिसे मोर्चाबन्दी याइपिं नेतात नं सत्ताय् थ्यनेवं हानं ब्राम्हणवादी हे जू वनीगु जुयाच्वन धइगु खँया थ्व नमूना खः ।

थुकिं सी दु, पद्मरत्न ला म्हिगःनिसें थौं तकं अनया अन हे तिनि, तर म्हिगःया वयक:या सहयात्रीत थौं तकया दुने गाक्कं परिवर्तित जुइधुंकल । म्हिगः तक उमि शत्रु कमल थापा, मित्र पद्मरत्न तुलाधर । थौं शत्रु पद्मरत्न, मित्र कमल थापा जुल । थथे गय् जूगु ?

म्हिगः तक कमल थापा विरुद्ध ल्वायेत उमिसं पद्मरत्नलिसे जानाः मोर्चाबन्दी याःगु खः । थौं पद्मरत्नलिसे ल्वायेगु लागिं कमल थापालिसे मोर्चाबन्दी यानाच्वंगु दु ।

केपी ओलीया मोर्चा थुभनं छाय् हिउगु खः? थुकिया कारण छु जुइ ?

वास्तवय् नेपाःया राज्यसत्ता खस ब्राम्हण समुदायया कब्जाय् लानाच्वंगु दु धइगु खँया थ्व दकलय् स्यल्लाःगु दसि खः । म्हिगः सतकय् लानाच्वंगु इलय् तक ब्राम्हणवाद विरोधीतलिसे मोर्चाबन्दी याइपिं नेतात नं सत्ताय् थ्यनेवं हानं ब्राम्हणवादी हे जू वनीगु जुयाच्वन धइगु खँया थ्व नमूना खः । सत्तां क्वय् च्वनाच्वंगु इलय् तक गुगु मूल्य व मान्यताया लागिं थःपिंसं राजनीति याना वयाच्वंगु खः, सत्ताय् थ्यनेवं वहे मूल्य व मान्यताया विरुद्ध आन्दोलन याये मालीगु अवस्था वइ । म्हिगः तक भारतया विरोध यानाः सत्ताय् थ्यंपिं सकलें सत्ताधारी जुइवं भारतभक्त जुइ धाये थें आन्तरिक सन्दर्भय् नं सत्ताय् वने न्ह्यः तक ब्राम्हणवाद विरोधी जुयाच्वंपिं नं सत्ताय् थ्यनेवं ब्राम्हणवाद समर्थक जुइ मालीगु जुयाच्वन ।

पद्मरत्न थौं तकं सतकया सतकय् तुं लानाच्वंगु हे थुकिया दकलय् ज्वलन्त दसु खः । सतकय् च्वनाः राजनीति यानाच्वंपिनिगु ला खँ हे त्वःतादिसँ, जंगलय् च्वनाः युद्ध याःपिनिगु तकं अवस्था वहे खः ।

थुकिं छगू स्वाभाविक न्ह्यसः पिहां वइ, छु देशं खस ब्राम्हणवाद सत्तां गबलें हे पिहां मवनीगु हे खत ? गुमिसं खस ब्राम्हणवादया विरोध याइ उपिं न्ह्याबलें सतकय् हे लानाच्वनीगु जुयाच्वन ? पद्मरत्न तुलाधर थें ?

 क्याटेगोरीः नेपाल भाषा