ईयूविरुद्ध बेलायती राष्ट्रवाद


देसंदे


थथे याकनं जुइ धकाः सुनां अनुमान याःगु नं मखु । अले आः अनुमान याये फयाच्वंगु नं मदु, थुकिया लिच्वः धात्थें छु जुइ धकाः । युरोपेली युनियन (ईयू) पाखें बेलायत अन्ततः अलग जुइगु पक्का जुल । नकतिनी बेलायतय् जूगु जनमत संग्रहया लिच्वः वःगु दु, अले थुकि त्याःगु दु, स्वतन्त्र बेलायतया पक्षधरत । अथे धयागु बेलायत ईयूलय् च्वना च्वने माः धयापिं समर्थकतय् हार ।

छुं भचा न्ह्यः जक कन्जरभेटिभ पार्टीया प्रधानमन्त्री डेविड क्यामरुनं ख्याः बच्छि नि बच्छि यासें जनमत संग्रह यायेगु घोषणा याःगु खः । वया निंतिं जनमत संग्रह बाध्यात्मक नं मखु । अयनं थुकिया उद्देश्य खः, बेलायतीत धात्थें ईयूया पक्षय् दु अथवा विरोधय् दु धकाः सिकेगु हे खः । उबले क्यामरुनया पूरा विश्वास ख, बेलायती त अझं ईयूया पक्ष हे दु ।

ईयू विरोधीतयसं नं उबले अनुमान याःगु खः, सायद व ई मवनि, गुब्ले बेलायत धात्थें ईयूपाखें अलग जुइ । तर जनमत संग्रहया लिच्वः सकसिया अनुमान याः कथं मजु । थ्व लिच्वः धात्थे हे गुलि तक स्तब्धपूर्ण जुल धाःसा प्रधानमन्त्री क्यामरुनं राजीनामा बीगु घोषणा तकं याये धुंकूगु दु । दच्छि न्ह्यः जक कन्जरभेटिभ पार्टीं हाकनं अनया संसदीय चुनाव त्याकूगु खः ।

पिने च्वंपि मनूत अप्वया वनेवं बेलायतीतयसं अनुभव यात, गनं छन्हु जिपिं अल्पमतय् लाइगु ला मखु ला ?

उकिं हे क्यामरुन सायद विचाः याःगु जुइमाः, जनमतं संग्रहया लिच्वः नं उकथंया हे जुइ । तर क्यामरुन थः स्वयं जक मखु, अप्वः धयाथें पश्चिमेली राजनीतिक विश्लेषक÷पन्डितत नं जनमत संग्रहया लिच्वः थथे जुइ धकाः अनुमान यायेत असफल जुल । आः दक्वसिया धयाच्वंगु दु, बेलायतया थ्व निर्णयया तःधंगु प्रभाव पूरा विश्वय् लाइगु जुइ ।

थुकियात आधुनिक विश्वया हे छगू तःधंगु घटना कथं कया तःगु दु । थुकिया प्रभाव प्रत्यक्ष रुपं राजनीतिक व आर्थिक क्षेत्रय् ला लाइगु हे जुल, उकिसियां तःधंगु प्रभाव कथं विश्वया शक्ति समीकरणय् तकं तःधंगु हिउपा: वइगु जुइ । थ्व हिउपा: गुलि तःधंगु जुइले सा ? थुकिया अनुमान धाःसा अ:पु मजू । धात्थेंया असर स्वयेत छुं मखुसां निदँ ला पी हे माली, अथवा व सिबें अप्वः तकं ।

तत्कालया ग्या:चिकु छु धाःसा गनं बेलायत स्वयं जकं अलग अलग जुइला मखु ला ? बेलायतय् प्यंगु देय् दुथ्याः, इङल्यान्ड, स्कटल्यान्ड, वेल्स व उत्तरी आयरल्यान्ड । जनमत संग्रहया लिच्वलय् गनं ईयू विरोधीत अप्वः खने दुसा, अनं समर्थकत । गथे स्कटल्यान्डय् समर्थकत हे अप्वः, अले उमिसं धाये धुंकूगु दु, जिपिं ईयूपाखें ताःपाक च्वने मफु ।

क्यामरुनं म्हितूगु छगू राजनीतिक दाउ अथवा धाये जोखिम गलत सावित जूगु दु । विचाः मयाः कथं जुइवं आः बेलायतया न्ह्यने न्हू न्हूगु चुनौती वइ ।

आः ईयूनाप च्वना च्वनेगु थःगु विचाःया मूल्यं स्कटल्यान्ड बेलायतपाखें अलग जुइत स्वल धाःसा अझ छु जुइगु खः अनुमान याये थाकु । प्रधानमन्त्री क्यामरुन स्वयं नं थथे जुइफु धकाः धाये धुंकूगु दु । ईयू व बेलायत दथुया स्वापु तसकं पुलां धाःसा जु, सन् १९७५ निसें थ्व न्ह्याःगु खः । उबले ईयूया ज्या यायेगु क्षेत्र आर्थिक जक खः, उकिं उबलेया सोच ‘युरोपेली इकोनोमिक सोसाइटी’ इ जक सीमित जुयाच्वंगु दु ।

बुलुहुं थुकिया लागा तब्याना वन । आःया ईयूया वास्तविक ढाँचा सन् १९९२ लय् जक तयार जूगु खः । अले ईयूं छगू क्षेत्रीय संगठनया स्वरूप कयाः यंकल । आ थत्थें ईयूलय् २८ देय् दु । अन च्वनिपिं जनसंख्याया ल्याः धासा ५० करोडसिबें अप्वः । थुकि दुथ्याःगु २८ मध्ये १९ देय् दुने साझा मुद्रा प्रचलनय् दु । लिपांगु इलय् स्थिति गथे तक जुल धाःसा ईयू झनझन बल्लाना वल, राजनीतिक र आर्थिक नितां ल्याखं ।

तर थुकी दुथ्याःगु देयतय् हैसियत धाःसा कमजोर जुया वन । जुजुं बेलायतया हैसियत तकं कमजोर जुल, अले बेलायती विदेश नीति तकं ईयूया प्रधान कार्यालय दुगु ब्रुसेल्सपाखें निर्देशित जुइगु जुयावन । बेलायती राष्ट्र यःपिं, अले अ:पुगु आप्रवास नीतिया विरोधीत ईयूया विरोधी जुइगु जुल हे । बुलुहुं ईयूयात स्वइगु मिखा नं पाना वन । ईयूया विरोधीत अप्वया वल ।

पिने च्वंपि मनूत अप्वया वनेवं बेलायतीतयसं अनुभव यात, गनं छन्हु जिपिं अल्पमतय् लाइगु ला मखु ला ? थुपिं सकतां कारणं बेलायतय् छगू न्हूगु पार्टीया जन्म तकं जुल, यूके इन्डिपेन्डेन्स पार्टी । मुख्यधारया निगू पार्टीत लेबर व कन्जरभेटिभया दबदबा दयावयाच्वंगु बेलायती राजनीतिइ यूके इन्डिपेन्डेन्स पार्टी याकनं याकनं लोकप्रिय जुया वन । borish-jonson

न्हापा साधारण पार्टीया हैसियतय् दुगु थ्व पार्टी आः बेलायती राजनीतिक थःगु खँ सकसितं न्यंकेत बाध्य यायेफुगु पार्टी जूगु दु । बेलायती घरेलु राजनीतिइ तयार जूगु छगू न्हूगु समीकरण छु धाःसा थ्व न्हूगु पार्टीया विकास व विस्तारया अर्थ सत्ताधारी कन्भरभेटिभ पार्टीया निंतिं घाटा खः, विरोधी लेबरतयत थुकिं यक्व फाइदा याइ ।

विशेषतः कन्भरभेटिव र यूके इन्डिपेन्डेन्स थःथवं ल्वात धाःसा फाइदा लेबरयात जुइ । लेबर पार्टीया राजनीतिक धरातल साम्यवादी खः, कन्भरभेटिव र युके इन्डिपेन्डेन्स धाःसा थुकिया अ:खः स्वइपिं खः । कन्जरभेटिभ प्रधानमन्त्री क्यामरुनं हथाय् चाना जनमत संग्रहया घोषणा याये माःगु नं थुकिं हे खः, छायधाःसा लेबर पार्टी नं ईयूया समर्थक खः ।

अले थःपिं जनमत संग्रहलय् त्यात धाःसा फाइदा खालि कन्जरभेटिभयात जक खः । तर थथे मजु । क्यामरुनं म्हितूगु छगू राजनीतिक दाउ अथवा धाये जोखिम गलत सावित जूगु दु । विचाः मयाः कथं जुइवं आः बेलायतया न्ह्यने न्हू न्हूगु चुनौती वा हाथ्यात वइ । बेलायत व ईयूया स्वापु गथे जुइ, न्हापलाक उकियात हे परिभाषित याये माली । अले आः या निचोड छु नं खः धाःसा, बेलायती राष्ट्रवाद हाकनं सिदयेक तच्वया वयाच्वंगु दु ।

twitter : @himeshratna

नेपालभाषा टाइम्स ने.सं. ११३६ तछलागा ६ पाखें

किपा : राष्ट्रवादी नेता बोरिस जोन्सनलिसे प्रम क्यामरुन ।

 क्याटेगोरीः नेपाल भाषा